La Universidá d'Uviéu asoleya los modelos d'esámenes de la futura PAU  

L'oxetivu ye amenorgar la opcionalidá hasta que les entrugues tomen tol temariu

Los modelos yá tán espublizaos na web de la Universidá d'Uviéu. Unu de los oxetivos ye que s'amenorgue la opcionalidá nos esámenes hasta que les entrugues o exercicios tomen tol temariu. Esta prueba, según los especialistes consultaos por TPA, va ser de transición. Les entrugues comprenderán alredor del 80% en dellos casos. Por casu, nel esame de Llingua Castellana y Lliteratura, los aspirantes van poder contestar seis preguntes.

Na nueva Prueba d'Accesu a la Universidá gana pesu'l nivel competencial y eso refléxase yá nos modelos. Volviendo poner l'exemplu de Llingua y Lliteratura. Enantes la prueba tenía tres bloques: el comentariu d'un testu, l'análisis llingüísticu del mesmu, y na parte de Lliteratura, les entrugues yeren, de calter teóricu dafechu.

Sicasí, na nueva PAU, nesta postrer parte tamién se propón facer el comentariu d'un testu lliterariu onde, por casu, l'alumnu va tener que reconocer el tema de la obra, dalgunes de les sos característiques principales, rellacionala col autor, la dómina o'l movimientu al que pertenez.

Per otru llau, cada exerciciu va tener una duración de 90 minutos. Ente pruebes consecutives, el descansu mínimu va ser de media hora.